सोलापूर ग्रामीणच्या पहिल्या महिला पोलिस अंमलदाराचा मान – मंजुळा धोत्रे यांचा उल्लेखनीय प्रवास.
सोलापूर (प्रतिनिधी) : कर्तव्यदक्षता, प्रामाणिक सेवा आणि सातत्यपूर्ण मेहनतीच्या जोरावर आपली वेगळी ओळख निर्माण करणाऱ्या मंजुळा मल्लिकार्जुन धोत्रे यांनी सोलापूर ग्रामीण पोलिस दलात उल्लेखनीय कामगिरी बजावली आहे. सध्या त्या महिला सहाय्यक पोलिस उपनिरीक्षक (ASI) म्हणून जिल्हा विशेष शाखा, सोलापूर ग्रामीण येथे कार्यरत आहेत.
मंजुळा धोत्रे यांनी दिनांक १ जुलै १९९५ रोजी महिला पोलिस शिपाई पदावरून आपल्या सेवेला सुरुवात केली. त्यानंतर त्यांनी विविध ठिकाणी जबाबदाऱ्या सांभाळत आपला अनुभव समृद्ध केला. पंढरपूर शहर, पंढरपूर तालुका, कामती, एलसीबी (LCB) तसेच अन्य महत्त्वाच्या विभागांमध्ये त्यांनी काम करताना गुन्हे उकल, गुप्त माहिती संकलन आणि कायदा व सुव्यवस्था राखण्यात मोलाची भूमिका बजावली.
त्यांच्या उत्कृष्ट कामगिरीची दखल घेत त्यांना आतापर्यंत तब्बल १२४ बक्षिसे मिळाली आहेत. विशेष म्हणजे, सोलापूर ग्रामीण जिल्ह्यातील पहिल्या महिला पोलिस अंमलदार म्हणून त्यांना प्रतिष्ठेचे मेडल मिळाल्याचा मानही त्यांनी मिळवला आहे. हा सन्मान त्यांच्या सेवाभाव आणि कर्तृत्वाची साक्ष देणारा आहे.
तीन दशकांहून अधिक काळाच्या सेवेत मंजुळा धोत्रे यांनी अनेक आव्हानांना सामोरे जात पोलिस दलात महिलांचे स्थान अधिक बळकट केले आहे. त्यांच्या या प्रेरणादायी प्रवासामुळे पोलिस सेवेत येणाऱ्या नव्या पिढीतील महिलांसाठी त्या आदर्श ठरत आहेत.
सध्या जिल्हा विशेष शाखेत कार्यरत असताना त्या गुप्त माहिती संकलन, संवेदनशील बाबींचे विश्लेषण आणि प्रशासनाला सहाय्य करण्याचे महत्त्वाचे काम पार पाडत आहेत. त्यांच्या कार्याची दखल वरिष्ठांकडून घेतली जात असून, सहकाऱ्यांमध्येही त्यांचा आदराने उल्लेख केला जातो.
मंजुळा धोत्रे यांचा प्रवास हा चिकाटी, समर्पण आणि कर्तव्यनिष्ठेचा आदर्श नमुना ठरत असून, सोलापूर ग्रामीण पोलिस दलासाठी अभिमानाची बाब आहे.
