सेवानिवृत्त एएसआय शाम गंभीरे यांचे निधन; सोलापूर पोलीस दलात शोककळा.
सोलापूर :- सोलापूर पोलीस दलात प्रामाणिक, शांत आणि कर्तव्यनिष्ठ अधिकारी म्हणून ओळख असलेले सेवानिवृत्त सहाय्यक पोलीस उपनिरीक्षक शाम गंभीरे (अण्णा) यांचे गुरुवार, १४ मे २०२६ रोजी दुःखद निधन झाले. त्यांच्या निधनाची वार्ता समजताच सोलापूर पोलीस दल, मित्रपरिवार आणि परिसरात हळहळ व्यक्त करण्यात आली.
शाम गंभीरे यांनी अनेक वर्षे सोलापूर पोलीस दलात सेवा बजावताना आपल्या कामातून वेगळी ओळख निर्माण केली होती. त्यांनी आपल्या कार्यकाळात शिस्त, प्रामाणिकपणा आणि जबाबदारी या मूल्यांना नेहमी प्राधान्य दिले. वरिष्ठ अधिकाऱ्यांचा विश्वास संपादन करत त्यांनी अनेक महत्त्वाची कामे यशस्वीपणे पार पाडली होती.
पोलीस विभागातील त्यांच्या सहकाऱ्यांच्या मते, “गंभीरे अण्णा” हे नाव विश्वासाचे प्रतीक होते. कोणतेही संवेदनशील अथवा कठीण काम असेल तर वरिष्ठ अधिकारी निर्धास्तपणे त्यांच्याकडे जबाबदारी सोपवत असत. कर्तव्याला सर्वोच्च मानणारे अधिकारी म्हणून त्यांनी अनेक तरुण पोलिसांसमोर आदर्श निर्माण केला.
सेवानिवृत्तीनंतरही त्यांनी सामाजिक आणि कौटुंबिक जीवनात साधेपणा जपला होता. त्यांच्या निधनामुळे पोलीस दलाने एक अनुभवी आणि विश्वासू सहकारी गमावल्याची भावना व्यक्त होत आहे.
त्यांच्या पश्चात पत्नी, एक मुलगा, दोन मुली, जावई, सून आणि नातवंडे असा परिवार आहे.
गुरुवारी सकाळी ११ वाजता माशाळ वस्ती येथील त्यांच्या राहत्या घरापासून अंत्ययात्रा निघणार असून, सोलापूर येथील मोदी स्मशानभूमी येथे त्यांच्या पार्थिवावर अंत्यसंस्कार करण्यात येणार आहेत.
